როგორ ავირჩიო სათვალთვალო კამერა
კამერის არჩევა ტექნიკური კითხვა არ არის. მთავარი კითხვა ერთია: რა უნდა დაინახო და რამდენად წვრილად. ყველაფერი დანარჩენი — მეგაპიქსელი, ობიექტივი, ჩამწერი — ამ პასუხიდან გამომდინარეობს.
ქვემოთ ის თანმიმდევრობაა, რომლითაც ჩვენ ვმუშაობთ ობიექტზე მისვლისას. იგივე თანმიმდევრობა შენც გამოგადგება, თუ თვითონ ირჩევ.
1. განსაზღვრე ამოცანა, არა ტექნიკა
ოთხი სხვადასხვა ამოცანაა და ოთხივეს სხვა კამერა სჭირდება:
- ამოცნობა — სახე ან ნომერი უნდა გაარჩიო. საჭიროა 4MP+ და ვიწრო ხედვის კუთხე.
- იდენტიფიკაცია — „ეს ჩვენი თანამშრომელია თუ არა". 2–4MP საკმარისია.
- დაკვირვება — რამდენი ადამიანია, საით მიდიან. 2MP და ფართო კუთხე.
- ფაქტის ფიქსაცია — რომ საერთოდ იყოს ჩანაწერი. აქ იაფი კამერაც მუშაობს.
2. აირჩიე ადგილები, მერე რაოდენობა
კამერების რაოდენობა ობიექტის ფართობით არ განისაზღვრება. მნიშვნელოვანია შესვლა-გასვლის წერტილები და ის ადგილები, სადაც ფული ან ღირებული ნივთი დგას.
- ყოველი შესასვლელი — ცალკე კამერა, კარისკენ მიმართული
- სალარო ან სეიფი — ცალკე, ზემოდან და ოდნავ გვერდიდან
- საწყობი — შესასვლელი და დერეფანი
- ეზო — პერიმეტრის კუთხეები, არა ცენტრი
3. IP თუ ანალოგური
| ანალოგური | IP | |
|---|---|---|
| ფასი (კამერა) | 82 ₾-დან | 124 ₾-დან |
| გარჩევადობა | 2–5MP | 2–12MP |
| კაბელი | კოაქსიალი + კვება | ერთი ქსელური (PoE) |
| მანძილი | 500 მ-მდე | 100 მ (გამაძლიერებლის გარეშე) |
| ჭკვიანი ფუნქციები | შეზღუდული | სახის/ნომრის ამოცნობა, ზონები |
ფასები ჩვენი კატალოგიდანაა და დღგ-ს შეიცავს. ახალ ობიექტზე IP ვურჩევთ. თუ კოაქსიალი უკვე გაყვანილია, ხშირად უფრო იაფია ანალოგურზე დარჩენა და მხოლოდ კამერების განახლება.
4. ღამე და უკუნათება
ინფრაწითელი განათება შავ-თეთრს იძლევა — ეს საკმარისია იმისთვის, რომ დაინახო, მაგრამ არა იმისთვის, რომ მანქანის ფერი თქვა. თუ ფერი გჭირდება, საჭიროა მუდმივი განათების მქონე კამერა.
ცალკე პრობლემაა უკუნათება: კამერა, რომელიც შესასვლელისკენ იყურება, დღისით ფანჯრის ფონზე მხოლოდ სილუეტს დაინახავს. ამას WDR ფუნქცია აგვარებს — შესასვლელის კამერაზე ის აუცილებელია.
5. ჩამწერი და ჩანაწერის ვადა
ჩამწერს არხების რაოდენობა განსაზღვრავს: 4 კამერა — 4-არხიანი, 8 კამერა — 8-არხიანი. აიღე ერთი საფეხურით მეტი, ვიდრე დღეს გჭირდება — გაფართოება ჩამწერის შეცვლაზე იაფია.
ვადა დისკზეა დამოკიდებული. მოძრაობაზე ჩაწერა ორ-სამჯერ ზრდის ვადას, რადგან ცარიელი დერეფანი არ იწერება. ზუსტ ციფრს კონკრეტულ კონფიგურაციაზე გაგიანგარიშებთ.
6. ის, რაც ყველაზე ხშირად ავიწყდებათ
- კვება. IP სისტემაზე PoE სვიჩი აუცილებელია — ის ერთდროულად კვებავს და აერთებს.
- UPS. დენის გათიშვისას სისტემა ჩერდება. სწორედ მაშინ, როცა ყველაზე მეტად გჭირდება.
- წვდომა ტელეფონიდან. ეს კონფიგურაციის საკითხია და არა კამერის.
- კანონი. კამერის მფლობელი მონაცემთა დამმუშავებელი ხდება — გაფრთხილების ნიშანი და წერილობითი პოლიტიკა სავალდებულოა. დეტალურად ცალკე სტატიაში.
ხშირი კითხვები
- რამდენი მეგაპიქსელი მჭირდება?
- შესასვლელზე და სალაროსთან 4MP+; ეზოსა და დერეფანში 2MP საკმარისია. ყველგან მაქსიმუმი დისკს ჭამს და შედეგს არ აუმჯობესებს.
- IP თუ ანალოგური?
- ახალ ობიექტზე — IP. არსებულ კოაქსიალზე — ხშირად ანალოგური ჯობია.
- რამდენი ხნის ჩანაწერი შემინახება?
- კონფიგურაციაზეა დამოკიდებული; მონტაჟამდე გაგიანგარიშებთ.
- ღამით რას ხედავს?
- ინფრაწითელით შავ-თეთრს 20–30 მეტრზე. ფერისთვის საჭიროა მუდმივი განათება.